物理治療＋中醫穴位，教你輕鬆幫個肺「解鎖」！
最近聽到外國有疑似鼠疫的新聞，大家難免會擔心肺部出事。
雖然專家已經證實只係虛驚一場，但講起「肺部唔舒服」，相信好多香港人都好有共鳴——平時感冒、流感好返之後，明明驗極都無事，但偏偏「唔斷尾」咳足成個月，喉嚨一痕就咳到停唔到，深呼吸時心口仲好似被塊大石壓住咁。
長咳同胸悶唔單止個人好攰，仲會令人心煩意亂。
其實只要用啱物理治療同中醫小方法，日常喺屋企、返工都可以輕鬆幫呼吸系統「鬆綁」！
物理治療兩招：暢通肺部、輕鬆排痰
準備瞓覺嘅時候，好多時先發現自己吸氣吸唔深，心口好似被塊大石壓住，越諗越難瞓著。
呢個時候可以試試掌心安撫閉氣法：將雙手掌心溫暖咁輕貼喺胸口，由鼻慢慢深吸一口氣，感受胸口微微升起，吸滿之後輕輕忍住啖氣 3 至 5 秒，再好似嘆氣咁緩緩呼出，放慢節奏做大約半分鐘。
其實我哋嘅肺泡之間藏住好多微細孔道，忍氣嗰幾秒正好畀空氣有足夠時間，慢慢滲透去平時縮埋咗嘅肺泡角落，令成個肺重新舒展開嚟，心口嘅大石自然放低，個人都可以安靜入睡。
第二朝瞓醒第一件事就想清喉嚨，但偏偏死咳爛咳都咳唔出，反而扯到肋骨同喉嚨痛。
不妨試下拍胸鬆痰配合中府穴擴胸：先將手掌微彎成空心杯狀，喺胸前鎖骨下方輕輕拍打幾下，利用溫柔嘅「噗噗」震動聲，幫手震鬆卡喺氣管深處嘅黏痰，之後輕輕一咳痰就好易出；
清完痰之後，再用雙手中指撳住鎖骨外側下方、靠近肩窩前胸凹陷位嘅中府穴，一邊深吸氣、手肘一邊向後擴胸，吸滿後忍氣 5 秒再慢慢呼到盡，連續做 9 下（中醫認為「九」對應肺部），即時打開鎖死嘅胸廓，以最順暢嘅呼吸迎接新一日。
中醫穴位與茶飲：驅走乾痕，畀身體補補氣
中醫話「所有痕癢都同風有關」，病好之後喉嚨成日發痕乾咳，好多時係氣管比較敏感，又有少少肺氣虛。喺人迫人嘅車廂或者全場安靜嘅會議室，最怕喉嚨突然好似有條羽毛掃過咁，越想忍越想咳，成個人極度尷尬。呢個時候可以即刻按揉風池穴急救：將雙手拇指移到後頸兩邊大筋外側嘅凹位（後腦枕骨下邊），深層打圈揉按 1 至 3 分鐘，帶少少酸脹感即可。佢可以幫你疏散上焦風邪，快速鎮靜咽喉神經，即時壓制住嗰陣想咳嘅衝動，化解尷尬場面。
有時晏晝兩三點，病後初癒成個人特別「虛」同「攰」，講多兩句電話都覺得唔夠氣，可以試下按揉靈骨穴提神補氣：用一隻手嘅大拇指，深按另一隻手手背大拇指與食指骨交界嘅深處（近虎口再上一點嘅骨縫），按落去會有好明顯嘅酸脹感，慢慢按揉 3 分鐘，做一隻手就夠。靈骨穴行氣溫陽好強，就好似隨身食咗啖人參咁，幫你補補肺氣、提振精神！
香港人坐 Office 長期吹冷氣，喉嚨乾到冒煙，飲極清水都好似「唔解渴」，氣管繼續乾痕。不如試下返到公司用保溫杯或水杯，落少少乾燥桂花，沖熱水焗 5 分鐘。熱焗桂花茶性溫味香，可以溫肺化痰，好似幫乾涸受損嘅氣管敷一層暖笠笠嘅保濕膜，好適合咳極唔停嘅打工仔作日常滋潤。
身體大病初癒，真係需要多一點時間同耐心慢慢修復，千祈唔好急，更加唔好死忍。
(溫馨提示：如果長咳伴隨持續高燒、濃血痰或胸口劇痛，記得及早諮詢專業醫生意見！)
EN 
ZH